Fag- og forskingsstipend frå Audiovisuelle oversetteres fond

Norsk audiovisuell oversetterforening (NAViO) deler ut fag- og forskingsstipend frå Audiovisuelle oversetteres fond (AViOF) til prosjekt som vil vere til nytte for norske audiovisuelle omsetjarar (AV-omsetjarar).

Stipenda skal gå til

· forskingsprosjekt som AV-omsetjarar vil ha nytte av i arbeidet sitt, for eksempel språkvitskaplege undersøkingar med problemstillingar som er relevante for AV-omsetjing, eller utvikling av tekniske eller elektroniske hjelpemiddel for AV-omsetjarar

· prosjekt som er med på å styrkje AV-omsetjarane som yrkesgruppe, for eksempel å delta på faglege arrangement, skrive artiklar eller utarbeide og halde foredrag

· andre prosjekt som vurderingskomiteen meiner er i samsvar med formålet for AViOFs fag- og forskingsstipend

Stipendsøknaden må innehalde

· ein detaljert plan for prosjektet som det blir søkt om støtte til

· kor stor sum det blir søkt om

· eit budsjett for heile prosjektet (dersom det er eller vil bli søkt om støtte frå andre enn NAViO, må dette gå fram av budsjettet)

· ei utgreiing som viser korleis prosjektet vil vere til nytte for AV-omsetjarar

Vurderingskomiteen er nedsett av årsmøtet i Norsk audiovisuell oversetterforening. I inneverande periode skal komiteen dele ut stipend for inntil kr 100 000 til saman. Det er ikkje sett nokon søknadsfrist, men komiteen vil ha møte omtrent ein gong i kvartalet for å vurdere innkomne søknader. Dei søkjarane som får tildelt fag- og forskingsstipend frå Audiovisuelle oversetteres fond, må inngå ein forpliktande avtale om prosjektet dei får støtte til.

Spørsmål om NAViOs fag- og forskingsstipend kan rettast til stipend@navio.no.

Søknader kan sendast til NAViO, Arbeidersamfunnets pl. 1C, 0181 Oslo eller per e-post til stipend@navio.no.